مجموعة دارميات جميلة ..اهداء..

تدري شكثر تشتاگـ
لطيوفك العين
ابكثرماتشتاگـ
زينب للحسين
==============
تبقه بوسط هالروح
تبقه انته ظلعي
ولو أحسب الغالين
إنته اغله ربعي
==============
مو من مرضونيت
من كثر الفراگـ
صدگني گلبي اعليك
كل لحظةيشتاگـ
==============
والحجر واهل البيت
والكفل أخته
والله امن اعداعزاز
أولهم انته
==============
رمش برمش شديت
مانامت العين
تسهروالك تشتاگـ
مطلوبة الك دين
==============
الولد لوفطموه
يبچيله يومين
بس انته من اتغيب
أبچيلك اسنين
==============

كونك امرايه اصير
ومعلگينك
وكلما أمر اعليك
عيني بعينك
==============
نوم المخدة ايلوگـ
للباله خالي
ومنين اجيب النوم
وانته اعله بالي
==============
بجاه الله والعباس
وبجاه الحسين
يحفضك رب الكون
من نظرةالعين
==============
صح انته عني ابعيد
من تحسب امتار
لاچن وسطه الروح
مبنيه الك دار
==============
وحدك سكنت الروح
وحدك معشش
بگليبي دور زين
دور وفتش
==============
بالگلب بالشريان
بنص روحي اخليك
حزب الله يرضون
نصر الله اسميك
==============

ضلمة ودرب عاثور
وهم حظر تجوال
أوصل واجيك ازحوف
واشكيلك الحال
==============
إنته التضل بالروح
والباقي فلسين
حبك نبت بحشاي
أقسم بالحسين
==============
كون الگلب ينصاغ
محبس ودزه
يبقه إلك تذكار
لجل المعزة
==============
فخخت روحي اليوم
كل هذالجلك
ولو مارضوا ينطوك
أنفجر بهلك
==============
كون انته هسه اهنا
كون انته يمي
كون انته بالشريان
توزعلي دمي
==============
متعجبه النسوان
براغب علامة
داخل حسن يسواه
ويسوه عمامة
==============

أهمس بإسمك دوم
فضحتني الاحلام
بطلت حته النوم
وبليلي مانام
==============
آسف يبعدالروح
تعذرني ريتك
عندي ظروف اهواي
بس مانسيتك
==============
الگلب ماينساك
بس هذا عيبه
صدگني من فرگاك
طلعتله شيبه
==============
هاك اخذ كلشي اتريد
شتريد اخذ هاك
هوه العمر فلسين
يسوه ابلياك
==============

أهلا وسهلا بيك
حيل الگلب صاح
لو ماتلزم هاضلوع
من فرگتك طاح
==============
وينك حبيب الروح
مشتاگـ اضمك
صح امشي بين الناس
بس روحي يمك
==============

إنته احله كل الناس
ياهواحله منك
حته الجمال اليوم
يسألني عنك
==============
صبح وعصروغروب
وبهدوة الليل
وبكل دقيقة الروح
تشتاگلك حيل
==============
كون انگلب طلقات
وادخل بگلبك
واكتب على الشريان
دمرني حبك
==============
ظلمة وحظر تجوال
وامريكي بالباب
ولو تنگلب طلقات
أتعنه الاحباب
==============
ظلمة وحظرتجوال
واليطلع ايموت
بس اليحب اهواه
يتحده ويفوت
==============

ظلمة وحظر تجوال
والشرطةتفتر
أوصل واجيك ازحوف
يالمعدنك در
==============

كون الگلب بيه باب
تگدر تشوفه
ولو شفت غيرك بيه
حگك تعوفه
==============
أگعد بتالي الليل
وادعي بصلاتي
ياربي بعد اهواي
شلي بحياتي
==============
من گلبي اخذ لحمات
خافنك اجوع
ولو مالگيت اشياش
شيش بالضلوع
==============
صح انته عني ابعيد
بس على بالي
واقرب إلي من الروح
حبك يغالي
==============
للموت اضل اوياك
مايوم املك
مابيه حيل افراگـ
من هسه اگلك
==============
تمرضت عشر امراض
واسهلهن السل
ولو بعد عشر امراض
منك فلا مل
==============

گلبي اللي چان بخير
وبخير نبضه
من فرگتك سكراب
بالسوگـ اعرضه
==============
بين الگلب والروح
إهنا أخليك
واكتب خطر ممنوع
محد يمربيك
==============
ناسي ونسيت الناس
بس مانسيتك
ولوغبت عن العين
بالدم لگيتك
==============
روحي وعيوني اوياك
والگلب يمك
يمشن سوه بشريان
دمي اويه دمك
==============
لوتدري هاي العين
شمسويه بيه
كل نظرة بيها اليوم
شفت المنية
==============
من الصبر مليت
والصبر ملني
ماأگدر بلياك
يمك دخلني
==============

مو مشكلة النفطات
ولا مشكلةالماي
مشكلتي ياهالناس
ماشايف اهواي
==============
أسأل عليك الناس
وين انته غايب
الگلب من فرگاك
شاف المصايب
==============
أتمنه اصيرن طيف
بالليل اجيكم
حته ابقه طول الليل
حارس عليكم
==============
كلما يمر الليل
والنجم يظهر
أذكرك واشتاگـ
واتمنه تحظر
==============
روحي اويه روحك دوم
شذرة اويه محبس
مصيوغه الك مخصوص
الچفك وبس
==============
عطشان اظل عطشان
واروه اعله شوفك
بطرانه هاي الناس
يردوني اعوفك
==============

أهلا وسهلا بيك
واكثر بشوفك
ولتفكر آنه بيوم
أگدر أعوفك
==============
أهلا وسهلا بيك
واكثربملگاك
والگعده تحله اهواي
من نگعد اوياك
==============
أهلا وسهلابيك
واكثر بالوياك
والگلب گبل العين
فز وتلگاك
==============
روحي سفينة شوگـ
وانته هواها
ولو فكرت تنساك
تغرگـ عساها
==============
مرتبط گلبي اوياك
والنبض منك
هم تظن يومانساك
واتخله عنك
==============
حسبالك آنه انساك
والكعبةغلطان
جوه الجلد موجود
يعني انته شريان
==============

إشتعل گلبي بنار
چي ماأشوفك
أنعل أبو الينساك
لابو اليعوفك
==============
كلما أريد انساك
تاخذني سكته
بالدنيه احب اثنين
بس الله وانته
* * * * * * * *
اتمنى تعجبكم

يمعودة أنتي شنو خليتي ما ذكرتيه
حتى يمكن بعد محد أينزل دارميات
الله عليج روعة كل ما نقلتي
بارك الله بيج

السلام عليكم

[ندعوك للتسجيل في المنتدى أو التعريف بنفسك لمعاينة هذا الرابط]

[ندعوك للتسجيل في المنتدى أو التعريف بنفسك لمعاينة هذا الرابط]

يسعد صباحكم اخوتي الكرام ,,
لقد تشرفت بمروركم الكريم .. وجزاكم الله كل خير عني .

[ندعوك للتسجيل في المنتدى أو التعريف بنفسك لمعاينة هذا الرابط]

روحي سفينة شوگـ
وانته هواها
ولو فكرت تنساك
تغرگـ عساها

روعة بارك الله فيك

الله يبارك بعمرك .. وقد عطرت متصفحي بمرورك

[ندعوك للتسجيل في المنتدى أو التعريف بنفسك لمعاينة هذا الرابط]

مرتبط گلبي اوياك
والنبض منك
هم تظن يومانساك
واتخله عنك

الف شكر اختي ع الدارميات الروعه
تحياتي لكي

اعد جروح كلبي ........ ماي عدي
ولهسة الفرح صدك ..... ماي عدي
اكل للحزن عدي .......مايعـــــــدي
يدوس على الجرح ويعم عليــــــة

نورت الدارميات بنورك ..

[ندعوك للتسجيل في المنتدى أو التعريف بنفسك لمعاينة هذا الرابط]