عرس الماي للشاعر كاظم غيلان

آنه طير
امهاجر بغابة عذاب
وللنبع كل يوم أنادي
وللعطش كل يوم أصيح:
راسي من يمتلي غِيرة
اجناحي هم يمتلي ريح
آنه طير
من الجنوب الشايل آذار بجبينه
وكل ربيع بطوله يمشي
نخلة نابت
ويه كل ريح احجي كلشي
آنه طير، اشما عليت اثكل
واغني امحمداوي
ع الليالي التعبتني
وع السنين الصارن لعمري بلاوي
وعلى كيفج يا سمه اوياي أنا..
من الريح داوي
آنه طير،
اعيوني من تجدح يشع بيها الحنان
وامي من توميلي بالطيف امتحان
واصدقائي الرايحين ابلا زمان ولا مكان
أنتظر..
يمته يجون
ويجي واحد
أمنت حته الخيانه
وهوه ما بي كل أمان
آنه طير
امتاني سجينة ذبح
ودمي جدامي لكيته يقره بكتاب الصبح
جدي يحفر لي كبر يم امي
ويكل للفلح:
هذا ابن بنتي النهيته من المدح.