باب الشوك
دوّرتك أمس بس ما لكيتك غاد
لكيتك ذكرى باقي وعندي مو عندك
من كد ما ثلج ظل طافي شوكي وياك
أموت من البـرد من أوكف بسدّك
أنه الوياك عشرة ، عشرة بيهه حساب
ما تخلص عمـر ومفصّله بكدّك
منّك عالكلب حسرة اعله كد الكون
وعالحسرة كلب من تطلع يردّك
صرتلك كاس لهفة مكاسر ابّوسات
يوميّة انترس واطّشّر بخدّك
أنه العندي خصمته وكلشي ما ضمّيت
إجه وكتك بعد خل نعرف شعندك
يمدّونك حبل وتكلي واكف سيف
ويسوّنك وصل وانه ابتلي بشدّك
خاف اطيح باجر ياهو يتلكّاك
إذا مات البديـك وذبّلوا وردك
الضدّك من كبل مو صعبه سهله اهواي
بس صعبة الوياك وينكلب ضدّك
وجبتهه وياك سكته وما كلتلك ليش
خاف الليش حجّه يخضّر بصدّك
مُرّك مو حلو مو مثل باقي الشوك
عكس الناس تمشي ويختلف ردّك
عاليمشي عدل موجدّي هذا اتكول
واليمشي عوج ظل ينحسب جدّك
مدري انت الغلط مدري الغلط بالعين
مدري الصوج بيه وضيّعت ودّك
لكن هسّه بيّن واحنه باخر باب
ومثل الباب باجر بالهوى نسدّك
ريح..ومن تهب للشجر تغسل ثوب
بس شوف التراب الجايبـه بسدّك
1997
ضوه النجمه
الحلو مو كل سهل
أحلى القصايد شعر .. من تصعب الكلمه
ومو كل صعب مو حلو .. جرّب حلات التعب
من توصل القمّه
العنده يقين بجرح .. ما يشتكي من الألم .. لو ما كثر لجمه
واضح جواب اللغز .. المات مثل العدل ..
بس وين اليفهمه
موفد عجيبة النفس .. مـا يشعر بلذّتـه المـايكدر يشمّـه
مرّات أحصل الإِلي .. والكه الإِلي مو إلي
وتحاشة مالزمه
من النوم جبت العمر .. وبهاي أنه كصّرت
ما كمّلت حلمه
بين النفس والشخص .. مرّات تلكه فرق ..
لا تغتر برسمه ..
جيب اللي يحجي بكلب .. ومن يمشي فوك الصخر
يترك أثر جدمه ..
يم باب بيت العشك .. موعيب لو دنّكت
واكعد عمر يمّه
بس شتكل للذي .. واكف صرح بالعشك ..
ويدنّك الخصمه
ورتاح ما أحترك .. لو يمّي صار الطعن ..
وتونّس بشتمه
جمّار كلب النخل والوادم ترجمه
لو إلك جان الدرب لتكول كلشي انتهه ..
حسّب حسابك عدل .. خاف الهوى يهدمه
مو بالكبارة الحجي .. مرّات تلكه طفل ..
وحجايته بحجمه
واشكد جبيرة السّمه .. وتحتاج لزغر فضل ..
لو ما الفضل تعمه
ساعة خسوف الكمر ..
جا تاه درب السّمه ..
لو ما ضوه النجمه
وميهمني عنّي شكلت .. شما زاد ذم الوفي ..
تعنيلة كلمة مدح .. لو فارغ يذمّه
2000
تمثال الزعل
أنه صوتي انذبح من كد الصياح
ولا واحد وصلني وكال شتريد
غلطه وما عرفت اشلون أختار
وسلّمت الزرع بيـد الحواصيد
أنه الماباع روحه وصار تمثال
وأخذ كلشي بزعل ماعاش تقليد
وانته الجان طولك سفرة أيام
هسّة بلايـه طول تلوحـك الإيد
عيّشتك بمان وحصّتي الخوف
اوّصلتـه الإديـك العنـّك بعيد
وجبت عاشور عمري احزان بحزان
أوّدّيته اعله بابـك من إجه العيد
جاي بيا وجه تعزفلي بالنوح
وانـه اعله الونيـن معلّم الناي
حسابي وياك عوفه وكلّي شتريد
على ياهي نِتحاسب صارن هواي
مريتك نهر بس انته صحراء
ومن حال الصحاري شياخذ الماي
أمّنتك عمر يالكتلي اتانيـك
كلت يمّـك أذب أحـزان دنيـاي
لكيت الهسّه عندك صار بعدين
وعلى شعره الزعـل كضّيته ويّاي
شتلتك شجرة ميته اوّركه مابيك
سوّيتـك صـدك وارسملـك فياي
لا تجبرني أسولف وانه مجروح
خـاف أزهـك وطلّع كلشي جوّاي
الأحد ديسمبر 01, 2013 10:29 pm من طرف ابوالشاطر
